Iniciativa pol Asturianu nes Ondes

Iniciativa pol Asturianu nes Ondes

Iniciativa pol Asturianu

Equí vos dexo un vidiu que trata de la Iniciativa pol Asturianu nel que se traten diverses temes d'Asturies y del Asturianu, nel da la xente dalguna de les sos opiniones y amás el interllocutor da muncha información to ella n'Asturianu. 

Amás al mesmu tiempu que ta pasando la conversación radiofónica tan mostrandose imáxenes d'Asturies. Ye mui prestosu y recomiendovos a toos que lu veaís... 

Equí vos dexo l'enllaz: Iniciativa pol asturianu

Pipotin y Charrán

Pipotin y Charrán

Coimbra

Amo la vieya tierra
onde te conocí

Los cantarinos árboles

d'aquel xardín

Las adondadas yerbas
arrescendientes a ti

Las estrel.l.as tan l.l.onxe
ya cerca de min

La fonte que llora
señaldaes ensin fin

Cuerpu de suenu ya l.l.uz
en cuyos becos me perdí.

(Xuan Martín)

Infancia I

Agora que yá nun somos nenos
ye triste otra vuelta deprender
el mieu, el silenciu vieyu
y aquella zrezal onde esguilemos tantes veces.
Dempués vinieron díes d'escuela,
del pupitre y la pizarra. Tarde d'avientu
na efímera memoria d'aquellos años
cásique nunca primaveres.
Agora, nel portalón salobre d'esti branu,
canten al sueñu les muyeres:
runxir amargu d'árbol triste,
figal torcida a la vera casona.

(Esther Prieto)

¡Sorprendente!

Fae unes selmanes los presentadores y concursantes de Superasturian@s vinieron al Entrego a  rodar dalgunos programes. Equí tenemos dalgunes imáxenes.

Debaxu los asfaltos

¡Nun pasarán! glayaben les banderes.
y nun pasaron.
nun fueron a llantase'n dengún llugar
nos nuesos corazones;
eso habría sío la verdadera conquista
pero nun pasaron,
porque nun pie tener enfotu
un corazón tarazáu pol mieu.
dixeron que diben damos una vida
nueva,
¡comu si daquién-yos la tuviere pidío!
fasta llegaron a creyer que tábamos marchitos,
que nun díbamos siguir guetando
les playes per debaxu los asfaltos...

(Xulio Vixil)

Tráesme la voz de la nueche olvidada

Tráesme esta nueche rostros sumerxíos
nes ascues dormiyoses de los llares,
la sombra tantiguada de los mares
averaos al Sur de los estíos.
Tolo qu' infancia foi, ritos perdíos,
la memoria que naspia nos telares,
grieta de lluz que posa nos altares
al resguardu d'iviernos avesíos.
Agua d' añil onde la vida quiebra
y espierta la pallabra reobrada
al tiempu encantexáu de la tierra.
Tráesme la voz de la nueche olvidada,
nel alba atormentada de la piedra
l' iris del llantu, blancu a la mirada.

(Lourdes Álvarez)

Como un campanariu
sin campana,
la ilesia sin santos
ya la pila sin augua,

lo mesmo, lo mesmo,
alcontréi la casa.

Todo taba en silenciu,
las ventanas pechadas,
paraos los reloxes,
sin roupa las camas.

Ya la xente...,
¿qué foi de la xente
que taba na casa?

(Nené Losada)

Cargadas d'orbayu
baixaban las nubes.

Los teyaos azules,
del norte asturianu,
lo mesmo q'espeyos
deixaban l'orbayu.

(Nené Losada)

Cuando atoupes un trébole
de cuatro fueyas
déxailu pa qu' outru lo alcontre.
Si lo rincas,
nun pa ti nin pa él
porque la suerte non ya esclava de naide.

(Nené Losada)

XXXIV Selmana de les Lletres Asturianes

Del 29 d'abril al 8 de mayu de 2013 cellébrase la 34 selmana de les Lletres Asturianes conmemorando a Nené Losada.

Nené Losada Rico (1921-2009) nació y pasó la mayor parte de la so vida en L.luarca, quitando unos pocos pero decisivos años - de los tres a los dieciocho - nos que vivió en Sanfliz, un pueblu cerca de Trevías, nel conceyu de Valdés. Esos años d'infancia y primer mocedá van influir tanto nos temes como nos recursos formales de la so poesía, polo menos en tres aspectos: la llingua na qu'escribe, el protagonista que tienen les muyeres y la utilización simbólica de la Naturaleza.
Escritora dende mui nueva, Nené Losada dexó tres de sí una considerable producción poética en castellanu y asturianu, recoyida en seis poemarios y diverses antoloxíes. A lo llargo de la so trayectoría, l'autora valdesana esperimentó una evolución nel tratamientu de la obra, dende una primer etapa más anclada na tradición popular (que cristaliza na publicación en 1992 de Cantares valdesanos), hasta otra posterior caracterizada nel planu formal pol abandonu de la rima y l'adopción del versu llíricu que se resuelve con gran intensidá en poemes de factura breve y condensada.

Mirose nel espeyu;
ya como si los años
mancharan el cristal
l.limpiólu con un trapu.
Los años rel.lucienon
ya nun se miróu más.

(Nené Losada)

Tien sede la fueya
que priende esqueicida
na cana;
l'arbol, ya vieyu,
siquiera la mira,
que son muitas fueyas
las que tien prendidas,
ya pouca savia.

(Nené Losada)

Aquel árbol

Aquel árbol,
aquel que nacéu a la vera'l ríu,
foi medrando col tiempu.

Güei ya un xigante
de troncu forniu
l.len de fueyas las canas
ya de paxarinos.

Lo mesmo que l'árbol
you medréi xunto al ríu
escribiendo poemas
ya... agora, que yá tán nos l.libros,
al pasar las fueyas
parezme ver paxarinos
como aquel.los del árbol,
que nacéu a la ver'l riu.

(Nené Losada)

¡Qué difícil ye

cuando too baxa

nun baxar tamién!

(Antonio Machado)

Agora que los regueros la truena

Agora que los regueros la truena
enancha y amagüesten
na soledá d'artales
los caminos ensin rozar.

Agora que se zarren
les vueltes, toles vueltes
del regresu, ¿quién va quedar
pa zarrar les cases y apuntalar
los trabes d'esti cielu?

¿Quién va quedar
últimu habitante, testigu
                                                                                    del abandonu?

                                                                                    (Pablo Rodríguez Medina)