viernes, 12 de abril de 2013

Agora que los regueros la truena

Agora que los regueros la truena
enancha y amagüesten
na soledá d'artales
los caminos ensin rozar.

Agora que se zarren
les vueltes, toles vueltes
del regresu, ¿quién va quedar
pa zarrar les cases y apuntalar
los trabes d'esti cielu?

¿Quién va quedar
últimu habitante, testigu
                                                                                    del abandonu?

                                                                                    (Pablo Rodríguez Medina)

D'un ríu

Falaré de la infancia ya d'un ríu
que corría monte abaxo hasta perdese
na llende de las tierras de los xaldos.

Un ríu qu'estremaba pueblos, acoyía nomes,
L'Ueyu Verde, Remoleiru, Lleirosu,
cuando cruciaba llibre las alturas.
Un ríu demorándose en bañales de piedra,
barcos pa las nubes ya espeyos
pa los güeyos profundos de las vacas.

Falaréis de muyeres embrocadas sobre l'augua,
de tardes de xabón ya cucharapas,
de la espuma delío, de pallabras,
que marchanon pa siempres ríu abaxo.
D'un mundu blancu boca arriba,
afitáu en corras de trapu na cabeza.

Falaréi d'un ríu que corría
arrastrando la tierra hasta perdese
nos escuros dominios de la sombra.

(Taresa Lorences)

lunes, 8 de abril de 2013

L' Asturies prieta y verde

¡Ai, Asturies de mio vida!
¡Ai, Asturies de mio muerte!
La que xorrez pela mina.
La que xorrez pelo verde.

Si verde tienis la cara
y el golor dafechu verde,
les tos sonsoneres agües
enforma le tienis prietes.

¡Ai, Asturies de mio vida!
¡Ai, Asturies de mio muerte!
La que xorrez pela mina.
La que xorrez pelo verde.

Chai pelos valles mineros
un frescor d'alboreceres
fasta poner el carbón
¡los ríos y l'aire verdes!


¡Ai, Asturies de mio vida!
¡Ai, Asturies de mio muerte!
La que xorrez pela mina.
La que xorrez pelo verde.

(Manuel Asur)

Romance de San Martín

Agora que ta francida
la cuenta de la memoria,
que los neños yá nun saben
nin lo que ye una fesoria,
nun se sienten xunto al llar
a beber de la parola
de los güelos y les güeles;
agora que yá ta rota
la cadena de los cuentos
que pasen de boca en boca;
agora vengo a contavos,
anque igual nun vos importa,
quién fue esi san Martín,
patrón de tanta parroquia,
que da nome a tantu pueblu
porque fue famosu enforma,
poco menos que san Pedro,
muncho más que santa Rosa,
precusor de san Francisco
nuna mañana invernosa.

(Xulio Arbesú)

Pipotín y Charrán



Sonetu IV. Llamamientu de cuquiellu.

Los güeyos de los tuyos tan sabíos,
el to rebañu nun bardial d’un puertu 
l’agua’l ríu turbio, l’aguañal muertu,
atrás queden diezmaos y vencíos.
La nueche de llenzos estremecíos
por estrelles, nun mapa del desiertu,
un mar pel medio y un futuru inciertu,
traza llaberintos indefiníos.
¿Qué se siente ensin salida, ensin sienda,
ensin llar nin dirección señalada,
ensin sur, ensin norte que t’entienda?
La vida xabazmente acorralada,
na medrana medra y fai que s’enciendatola esperanza del que nun tien nada.

(Miguel Allende)

Silenciu nel corazón, Jaume Cela

Reseña:
Título: Silenciu nel corazón
Autor: Jaume Cela.
Torna al asturianu: Xuan Bello
Númeru de páxines: 164
Premiu: abril 1999
Editorial: Llibros del pexe.
Editores asociaos.


     Pal grupu d’amigos de Xuan, la Guerra entama un día calurosu de branu cuando,  apaez un coche y baxen dalgunos homes armáos entrugando pol cura Miguel mientres xugaben a la pelota na plaza.
    Tamos nel branu de 1936, nun pueblu de Catalula onde les noticies llegaben tarde, al traviés de la radio del bar o la xente de la ciudá que subía a comprar. Xuan, que ye’l cronista d’estos fechos, reconoz a Paco ente la xente armá, esti yera el chaval col que veía pasear a la so hermana María, que camudaba la cara cuando taba con él. Fascinaos pola presencia de les pistoles los guah.es siguen a los homes hasta la rectoría y son testigos de cómo lleven al cura. Esti fechu conmueve a tol pueblu, donde casi toos dan por muertu al probe cura y les conversaciones lleguen a oyíos de los neños, que traten d’esplicase por qué tol mundu llama a aquello guerra y los cambios que puen llegar a traer, mientres nun dexen de soñar nun futuru espléndidu.
            Xuan y Jorge, que ye’l so meyor amigu, quieren ser arqueólogos y dediquénse a enterrar güesos y otres coses (escribiendo’l nome nellos) pa que lu topen científicos del futuru. Jorge ye’l únicu del grupu que cree que’l cura nun ta muertu y los díes acaben dando-y la razón: gracies a la mediación del alcalde, al cura Miguel lliberénlu y marcha pa Francia.
            Al día siguiente, pela mañana los dos guah.es queden pa dir a pescar y mientres perseguíen ranes toparon el cuerpu d’un home muertu que ta escondíu ente unos artos y cubiertu de mosques. Poques veces habíen dio corriendo hasta’l pueblu pa dar la noticia. El cadáver yera’l d’un industrial testil de cerca de Manresa. Juan, que yera mui sentimental, tras saber aquello sufre pesadilles, fiebre y vómitos durante unos cuantos días, que pasa na cama mientras lu curia so madre. Mientres ta na cama malu, visitalu Ramón, el maestru que intenta explica-y los desastres d’una guerra y los motivos y consecuencies que pue traer pa los que la viven tan de cerca.
            Los díes pasen y llega el branu cuando Jorge-y confiesa a Xuan que ta enamoráu de Rosario, y de sópitu el Xuan tien un ataque de celos qu’acabará fortaleciendo la so amistá. Falen a menudo y confíense les inquietudes que-yos ocasiona crecer, porque temen que si la guerra dura munchu tiempu yos toque dir a ellos al frente. Ésti ye casi l’únicu tema de conversación nel pueblu: nel bar  la tensión ta nel ambiente y ya nadie s’ esmolez de si hai guah.es delante pa falar ensin papes na boca. Hailos qu’acusen a los militares de too; otros recuerden que los republicanos tampoco son santos, y les muyeres culpen a toos y laméntense de ser les víctimes a quien naide fai casu.
            Un día, mientres paseen cerca del pueblu los dos neños oyen un ruíu extrañu que paez venir del cielu. Ye un avión que sobrevuela la zona y cuando lu descubren, Xuan y Jorge corren a avisar al pueblu d’un posible bombardéu. Pero nun pasa na y la xente rise d’ellos. Ellos nun saben que’n realidá esti va ser l’aniciu de la guerra’n casa Xuan, que como él había dicho unos díes antes el so tíu Bernaldo, l’hermanu pequeñu de so madre.      La discusión será ente los tres adultos de la casa, sobre too ente la ma y el tíu de Xuan qu’ acaben llorando. Bernaldo esplicará la so decisión al so sobrín diciendo-y que hai dos planos na hestoria humana: la que s’escribe en lletres grandes que ye la de los grandes homes y la que s’escribe’n minúscules, que ye la de los payeses y de los trabayadores, que anque nun tengan na que ver, tan subordinaos a aquellos.
            Beraldo marcha y cumple cola so promesa d’escribir a menudo, mentanto tien llugar el capítulu más cruel de la guerra. María confiesa-y al so hermanu que se va casar con Paco cuando fine la guerra. Ésta decide dir a Granollers a visitar al so amáu pero ya nun vuelve porque muerre nun bombardéu y ye’l mismu Paco quien la descubre ente escombros y quien da la noticia a la familia. Entos, pa Xuan la pallabra guerra garra nesi mesmu momentu un terrible significáu.

Valoración personal:
            Esti llibru prestóme muncho pola manera cómo se narren los acontecimientos que pasen, amás de la forma que tien l’autor Jaume Cela de dexate ca vegada que fina con un capítulu con una intriga que t’incita a seguir lleéndo. Pola forma de rellatar los momentos que pasa Xuan día a día faete metete costantemente na hestoria faciendo al autor ser y vivir cauna de les situaciones poles que pasa Xuan.
            Ye mui prestosu, porque amás de too esto que dixi anteriormente tamién ye un llibru que narra la hestoria d’España cuando la Guerra Civil Española.


Víala ellí, nel bancu de siempre
moñu blancu, mirada escura.
Tan enroñadina, tan sola...
Tremaben-y les manes, sele,
dos páxaros de ñeve.
¡Cuántes caricies,
cuantu calor,
cuánta vida!
¡Vense agora tan vacies!
Examás fui quien a ve-y la cara, perseguíame'l suañu
nueche
tres nueche;
                                                                                    pero güei conseguilo,
                                                                                    esperté de repente:
                                                                                    yera yo.

                                                                                    (Mª Elvira Laruelo de la Roz)

Amor

Amor
nun oigas la tormenta
nun l.levantes los güeyos
nin apestañes siquiera
chega la nueche negra
envu´lvenos la escuridá
fatígome al respirar
abrázame
amor
chegará un respiru d'aire puru
sentiremos pasos sublimes
sentiremos el silenciu
la paz
amor.

(Mª Esther García López)

Bástame




Bástame

saboriar los tous besos
sentir las tuas palabras
singulares.
Sentir las tuas manos
dibuxar l'amor
nel mio cuerpu
friolentu,
respigáu
Bástame
Bástame apegame a ti
tolos días
con pegamín de sudor encesu
BÁSTAME.

(Mª Esther García López)